Hademay yangi o‘quv yili ham boshlanadi. Shu kunlarda ko‘plab ota-onalar farzandlari uchun o‘quv qurollari, maktab formalari olib berish taraddudida yurishibdi. Lekin bolalari kam-ko‘stini ortig‘i bilan qilishga, ularga o‘quv qurollari, maktab kiyimlari olib berishga hammaning ham qurbi yetavermasligi mumkin. Shukurki, oxiriatni o‘ylaydigan, yordamga muhtoj oilalarga qayishadigan saxovatli yurtdoshlarimiz bor ekan, ko‘plab oilalarda voyaga yetayotgan bolalar yangi o‘quv yilini xursand holda kutib olishga musharraf bo‘lishmoqda.

Jonajon Vatanimiz mustaqilligining 34 yilligi va yangi o‘quv yili boshlanishi munosabati bilan «Vaqf” xayriya jamoat fondining Farg‘ona viloyati filiali xodimlari saxovatli homiylar bilan birgalikda katta xayriya aksiyasini tashkil etishdi. Ijtimoiy himoyaga muhtoj, kam ta’minlangan oilalarda o‘sib-ulg‘ayayotgan 1000 nafarga yaqin bolalarga maktab sumkalari, o‘quv qurollari va maktab formalari xayriya qilindi. Saxovat tadbirlari davom etmoqda.

Himmatli homiylarimiz va muqarrab duogo‘ylarimizdan Alloh taolo rozi bo‘lsin!