Жорий йилнинг 5 сентябрь куни Ўзбекистон мусулмонлари идораси тасарруфидаги олий ва ўрта махсус ислом таълим муассасаларида янги 2022-2023 ўқув йили бошланди. Шу муносабат барча таълим муассасаларида Ўзбекистон Республикаси Мустақиллигининг 31 йиллиги ҳамда 2022-2023 ўқув йилининг очилиши муносабати билан “Янги Ўзбекистонда эл азиз, инсон азиз!” шиори остида тадбирлар ўтказилди.
Бундай тадбир Тошкент ислом институтида ҳам бўлиб ўтди. Уни Тошкент ислом институти ректори Уйғун домла Ғафуров очиб берди. Шунингдек, 2022-2023 ўқув йилининг очилиши муносабати билан ўқитувчи ва талабаларни муборакбод этиш учун ЎМИ Таълим ва илмий-тадқиқот бўлими мудири Салоҳиддин Шерхонов, Тошкент шаҳар бош имом-хатиби Саййид Раҳматуллоҳ Термизий сўзга чиқиб, янги ўқув йилида барчага муваффақият тилади. Шу билан бирга илмнинг фазли ҳақида сўз юритдилар.
Тадбир сўнгида ўқув йилининг баракали бошланиши, талабаларнинг илм йўлида муваффақиятларга эришишлари ҳамда юртимиз фаравонлиги ва тинчлигини Аллоҳ таолодан сўраб дуолар қилинди.
Бундай байромона йиғилиш «Кўкалдош» ўрта махсус ислом таълим муассасасида ҳам бўлиб ўтди. Тадбирга Ўзбекистон мусулмонлари идораси раиси ўринбосари Ўткир Ҳасанбоев, Таълим ва илмий-тадқиқот бўлими мудир ўринбосари Акбар Дўсматов, Вазирлар Маҳкамаси ҳузуридаги Дин ишлари бўйича қўмита Таълим бўлими масъул ходими Нусратулло Нодиров ҳамда талабаларнинг ота-оналари ва фахрий устозлар таклиф этилди.
Тадбир давомида сўнгги йилларда диний-маърифий соҳада эришилган ютуқлар ҳақида сўз юритилиб, барча дин вакилларига бир хил шароитлар яратилгани, аждодларимиз асарлари авлодларга етказиш учун кенг кўламда ишлар олиб бораётгани таъкидланди. Айниқса, диний таълим соҳасида эришилган ютуқлар бирма-бир тилга олинди.
Шунингдек, йиғилиш сўнгида талабалик шарафига муяссар бўлган ёшларга панду-насиҳатлар берилиб, Қуръони карим тиловат қилинди ва хайрли дуолар ўқилди.

Қайд этиш жоизки, янги ўқув йилининг илк дарси – Ўзбекистон Республикаси Мустақиллигининг 31 йиллик байрамига бағишланган “Мустақиллик дарси” билан бошланди.

Манба: Muslim.uz