Бугун Ўзбекистон мусулмонлари идораси ҳузуридаги “Вақф” хайрия жамоат фондида Малайзия Республикасининг исломий молия соҳасида ихтисослашган INCEIF университети делегацияси билан учрашув бўлиб ўтди.
Учрашувда университет вакиллари Шазмир Мухтар, Моҳд Ҳаснол Моҳд Юнус ҳамда Фотима хоним иштирок этди.
Мулоқот давомида томонлар ўртасида исломий молия ва вақф соҳаларини ривожлантириш, халқаро тажриба алмашиш, илмий-тадқиқот ишларини кенгайтириш ҳамда малакали мутахассислар тайёрлаш масалалари атрофлича муҳокама қилинди.
Хусусан, ўзбекистонлик ёшларни INCEIF университетида исломий молия йўналиши бўйича магистратура ва докторантура босқичларида таҳсил олиш учун юбориш, уларнинг халқаро таълим дастурларида иштирокини таъминлаш ҳамда келгусида малакали кадрлар салоҳиятини ошириш юзасидан фикр алмашилди.
Шунингдек, вақф соҳасида илмий-амалий ҳамкорликни йўлга қўйиш, мазкур йўналишда қўшма тадқиқотлар олиб бориш, илмий семинар ва конференциялар ташкил этиш, илғор халқаро тажрибаларни ўрганиш ва уларни миллий амалиётга татбиқ этиш масалаларига алоҳида эътибор қаратилди.
Музокаралар якунида ўзбекистонлик ёшларнинг Малайзиядаги мазкур нуфузли таълим муассасасида таҳсил олиш имкониятларини кенгайтириш ҳамда вақф ва исломий молия соҳаларида ўзаро илмий-амалий ҳамкорликни ривожлантириш бўйича ўзаро келишувга эришилди.
Мазкур учрашув икки томонлама ҳамкорлик алоқаларини янги босқичга олиб чиқиш, соҳа учун халқаро тажрибага эга малакали мутахассислар тайёрлаш ва вақф институтининг илмий-амалий асосларини янада такомиллаштириш йўлидаги муҳим қадам бўлди.
